登機證 啤酒鬥 Hilton 沖繩

0
1409

6

Hotel Orion Motobu Resort& Spa

登機證

啤酒鬥 Hilton 沖繩

布吉或峇里的新 resort密密開,新鮮感開始欠奉,今次終於輪到沖繩,難得一次過連開兩間大型豪華 resort!名牌集團 Hilton開設日本第三間休閒 resort,以全新姿態示人,國際品牌搭上南國風情,吸引不少觀光客率先試住。另一間更有驚喜,是沖繩本地著名啤酒廠 Orion跨界開設首項大型酒店項目。兩間 resort定位相似,同樣有 180度碧海藍天美景,更不約而同位於著名觀光景點旁,有冇咁巧合?趁十一月前仍然是沖繩的旅遊旺季,今次逐一比併,揀 A餐名牌、還是 B餐啤酒?睇完先作心水決定。

游水再浸溫泉夠爽

Hotel Orion Motobu於 7月 26日才開業,集團在那霸市有一間觀光型酒店,今次首次擴展至豪華 resort,進佔沖繩本部地區。請來東京晴空塔的設計師之一吉野繁操刀,外形以郵輪為藍本,每層都有甲板般的長露台。酒店標記以附近景點備瀨福木林道作靈感,充滿地道色彩。
歎 resort泳池好緊要,尤其九月仍然炎熱,梗係把握最後機會曬太陽。 Orion有三個泳池,最正是 Club Wing住客專用的 infinity pool,位於酒店三樓,雖然唔大,不過池水是恒溫,全年開放,現時住客不多,隨時變成一人包池。泳池旁有小酒吧,仲有六個額外收費的冷氣開放小屋,最大一間玻璃屋連電視都有! Orion還有殺食的海景溫泉,泉水是天然地下源泉,鹽分特別重,有效紓緩疲勞,秋冬來唔游水都可以浸溫泉。


Hilton Okinawa Chatan Resort

Emerald Beach屬於海洋博公園一部分,距離酒店只有五分鐘步程,是日本唯一一個位於礁湖內的海灘,水質達最高級數的 AA級,大到可容納三千人。


Orion Motobu室外主泳池面積六千多呎,營業時間由四月至十月,唔係住客都可以付費入場。

沖繩溫泉不多,「美麗海之湯」為本部天然溫泉水,源泉位於地下 1,500米,建議黃昏時先浸,冇咁熱!

Club Wing住客獨享的 infinity pool連按摩池,可遠眺樓下泳池及沙灘景致,另外還有一個全年開放的室內池。

兒童房間玩到癲

去沖繩唔同去東京大阪住蚊型房,夠大夠舒適是常識吧。 Orion所有房間都是海景露台房,分標準房大樓 Ocean Wing及高級房大樓 Club Wing。 Club Wing得 23間套房,房間面積七百呎至過千呎,每房只限兩名成人入住,隔絕嘈喧巴閉的家庭客,還可以獨享私家大堂及 infinity pool,出入要拍房卡,絕對是明星級享受。普通 Ocean Wing房間都有五百多呎,最多可住四人,房間設計以白色配上藍綠色,同樣走簡約路線。
難得酒店特設三間小朋友主題房,設計靈感源自水族館,分別以海龜、鯨鯊及小丑魚三款不同色調,牆上有手繪圖畫,天花板亦畫上一片片白雲,夜晚更有熒光圖案,咁夢幻,小朋友實開心。床褥鋪在地板軟墊上,地板及電視櫃設防撞軟膠,小朋友在房內狂奔亂跳都得,又設有兒童專用的浴袍及矮身洗手盆,非常細心。童心未泯的大人都可以預約,不過每位要加$170,預咗要爭!


兒童房床鋪較矮,天花板上滿是藍天白雲,床邊有軟膠包圍,最啱活潑好動的小朋友跳跳扎!

牆上的壁畫由當地學生繪畫,相當可愛,房內又有圖書俾小朋友睇,很細心。

Club Wing全部均是套房,分 Junior、 Club及 Royal Suite,以青綠色作主調,幾舒服, expedia網上優惠價 Junior Suite$4,035起/晚。

酒店的琉球庭園保存了原有的福木及石頭等天然景觀,包括一棵有三百年歷史的古樹,當地人更會在特別日子前來供奉祈福。

五菜系私房菜必飲生啤

地理位置輸蝕、距離最近的名護市都要半個鐘車程,好彩酒店有七間酒吧及餐廳,唔怕餓親!日式燒肉餐廳 Capella為無煙燒烤,套餐有沖繩豬肉、美國安格斯牛肉及海鮮等,價錢每位$300起,唔算太貴。沖繩風居酒屋主打地道鄉土菜式如花生豆腐、炒苦瓜等。主要餐廳「銀河」最具特色,形式似私房菜,五間房分別供應西式、中式、日式、天婦羅及鐵板燒五種菜系,全部設開放式廚房,吧枱只坐八至九人左右,廚師在客人面前即席製作,套餐約$516起,住幾晚,食足幾晚都唔怕厭。而且所有餐廳供應 Orion生啤,由附近工場直送,仲有最新款式,保證新鮮!


酒店的大堂外有個超長大露台,可以點一杯冰凍生啤,欣賞藍天碧海美景。

有各種口味的 Orion啤酒出售,如無酒精、夏日特別版及果酒等,點解有 Asahi?原來在沖繩兩者出自同一啤酒廠。


沖繩出產的鯛魚及龍蝦刺身,配上魚子醬、香草醬及迷你香草,入口清新帶甜。(八道菜套餐,每位$664)

本部牛肉是當地盛產牛肉,肉味濃郁,只輕輕炭燒,加上海鹽、胡椒及醋汁,鮮嫩有致。(八道菜套餐,每位$664)

銀河餐廳內有五種不同菜系,只有吧枱座位,枱上設電磁爐,由廚師在客人面前即席製作,很有新鮮感。

Hotel Orion Motobu Resort& Spa
地址:國頭郡本部町備瀨 148番地 1
電話:+81-980-51-7300
房價:$3,428起/晚( Expedia優惠價$2,173)
網址: http://www.okinawaresort-orion.com

古宇利觀景台睇大橋


古宇利大橋連接屋我地島及古宇利島,長 1,960米,橋頭更有餐廳及小餐車,可以一邊食雪糕一邊欣賞大橋美景。

位於本部地區的 Orion,距離那霸兩小時車程,比較偏僻,不及 Hilton便利。附近除了有遊人必到的沖繩美麗海水族館及 Emerald Beach,還有距離半小時車程的古宇利島。由酒店可以駕車直達,經過全日本最長的免費大橋,就到達這個被稱為「神之島」的小島,行一圈只需 10分鐘。島上有不少隱藏景點,包括無人沙灘、心形石頭等,去年 11月開業的古宇利 Ocean Tower,樓高 82米,瞭望台對正古宇利大橋及 270度環迴海景,一睹馳名的古宇利藍!下層為貝殼博物館,藏有一萬個以上來自世界各地的貝殼。古宇利島更是沖繩海膽盛產地,每年夏季都有人慕名來吃海膽丼,可惜今年休漁期冇得食,唯有明年再來過!


古宇利島又名戀島,因為島上流傳了沖繩版亞當與夏娃的傳說,亦源自這塊經風化而成的水中心形石頭。

瞭望台高 82米,外形如火箭,樓高三層,除了博物館外還有餐廳、商店,最頂一層為收費影相館。

貝殼博物館有多達一萬種不同貝殼,包括珍貴的深海貝殼、色彩繽紛的天然貝殼及心形貝殼等。

古宇利 Ocean Tower
地址:今歸仁村古宇利 538番地
電話:+81-98-56-1616
營業時間: 9am-6pm
入場費:成人$59、中學生$44、小童$22

沖繩最大泳池


Hilton Okinawa滑梯長 90米,雖然唔算斜,勝在有彎位都有一定速度,好玩!

Hilton其實早已進駐沖繩,市區的 Double Tree by Hillton主攻平價旅客,今次則升格成為豪華度假酒店。同樣於七月才開業,位於沖繩正中央的宜野灣美國村旁,村內有商店、餐廳及超市,步行路程已經可以食買玩。不過要預咗住客多,今次到訪入住率高達九成,而且有好多香港人及強國人,缺少避世度假 feel。
Hilton有縣內最大泳池,成人池及小朋友池以橋分成兩邊,要行上行落,唔夠方便。小朋友池再細分嬰兒池,池水只及腳眼,面積加埋仲大過成人池,而且有條滑梯可以玩吓,大人小朋友都爭住玩!成人池有齊圓形沙灘梳化、水中沙灘椅,更免費借出浮條,四周種滿熱帶植物,有點泰國風情。不過泳池開放時間隨季節而定,現時晚上七點就關閉,室內恒溫池只長 17米,唔多夠喉!


酒店 spa用上沖繩海鹽、薑花及英國名牌 Elemis護膚品,價錢唔平,一般 60分鐘按摩由$1,128起,兩小時招牌療程由$2,390起。

小朋友池大過成人池,有一長一短滑水梯, BB池水深只及腳眼,最啱一家大細玩水。

酒店前暫時未有建築物,兩年後海邊很大機會會興建低層商場,景觀將會冇咁開揚。

套房吸引無敵夕陽景

Hilton共有 346間房,屬同區最大型 resort,而且正正位於海旁,地理位置冇得輸。八成房間向海兼有露台,最底層房間可直達泳池,很方便,但只得園景。其餘房間面向美國村,可以見到摩天輪,夜景較靚,價錢平少少。強烈建議唔好慳,因為海景無遮擋,放眼海天一色,日間看到清澈藍綠色海水,最正是每日傍晚的日落醉人美景,單是欣賞 magic hour都值得!房間設計是一貫 Hilton標準,驚喜不大,勝在房間及浴室都夠寬敞,浴室設窗戶,可以對住海景沖涼。套房面積 800呎,設衣帽間、雙人洗手盆,客廳的貴妃椅梳化闊到可坐四人,更有兩部 3D電視,任睇免費電影,設備豪華,住客亦可以到專用 lounge休息,套房房價當然貴得多,一家四口住一間就最 fit。


套房比一般房用更高級的 3D電視,有多套電影免費任睇,夜晚在房內都唔會悶。

套房設計一般,簡潔但面積夠大,而且位於頂樓,風景最靚,由$3,356起/晚。

露台唔算太闊,勝在視野無阻擋,每天一到黃昏時分,住客都會走出來看日落西下。

酒店內放滿本地藝術家新垣優香以傳統工藝紅型製成的畫作,職員制服亦有點點沖繩風情。

房間設計簡約,沒有多餘裝飾,枱燈及座地燈都以珊瑚製成,帶出海洋主題。

唯一高檔意菜


餐廳有落地玻璃,可以享受自然陽光,晚上燈光則昏暗得多,適合情侶撐枱腳。

餐飲方面 Hilton較遜色,只有自助餐廳及意大利餐廳 Corrente,環境及食物其實不錯,但附近有太多選擇,吃一次已夠。 Corrente取材自紐約式意菜,菜式偏向新派,用上沖繩食材如海鮮、蔬菜及豬肉等,如以本地鮮魚製成的魚生薄切、沖繩著名的紅芋濃湯、和牛配盛產的杧果醬,充滿地道風味。必點即叫即製的薄餅,以意大利運來的石爐烘焗,餅底充滿炭香。環境都算浪漫,落地玻璃夠舒適,又設戶外座位,夜晚可以出外飲杯酒。晚市套餐由$332至$738,不算便宜,但區內沒有 fine dining,這裡是情侶撐枱腳最佳選擇。
想去沙灘,最近有 Sunset Beach,但遊人多、海水又唔算清,距離十五分鐘車程的 Araha Beach更正,全沙灘幾乎只有日本人,水清到有魚仔,而且免費入場及泊車。酒店每小時有免費高爾夫球車接載,加分!


由意大利運來的薄餅烤爐,放在開放式廚房中央,傳來陣陣烤焗香氣。

沖繩雜燴海鮮$184當地海鮮如鯛魚、帶子、蜆及蝦等,加入番茄及紅花燴成,入口較清淡,每口都是鮮甜味。

Hilton Okinawa Chatan Resort
地址:中頭郡北谷町美浜 40-1
電話:+81-98-901-1111
房價:$2,165起/晚( Expedia優惠價$1,954)
網址: www3.hilton.com/en/hotels/japan/hilton-okinawa-chatan-resort-OKAOCHI/index.html

Expedia沖繩優惠


Araha Beach不及 Sunset Beach出名,所以遊人較少,但水質算清澈,垃圾亦少,沙灘後方有公園及燒烤場。

簽證:持特區護照及 BN( O)均無須簽證
機票及酒店:經 Expedia購買香港航空機票前往沖繩,票價由$3,583起。即日起至 9月 17日, Expedia提供沖繩旅遊特別優惠,沖繩 49間酒店均有特價,平均七至八折,最高折扣可達半價。出發日期由 9月 15日至 10月 31日,正好玩埋旺季!除了兩間新酒店,其他推介酒店有 Rizzan Sea-Park Hotel Tancha-Bay(每晚$3,177)、 Vessel Hotel Campana Okinawa(每晚$3,300)、 InterContinental ANA Manza Beach Resort(每晚$3,525)。一次過購買機票連酒店的自由行套票,比起分開預約平 25%。購票網址: expedia.com.hk
交通:沖繩交通不便,建議自駕遊最方便,租車公司包括 OTS、 Nippon Rent A Car及 Toyota Rent A Car等。兩間酒店均於旅遊景點旁,在機場及那霸市均有長途巴士直達。
鳴謝: Expedia.com.hk
撰文:張頌婷
攝影:陳家維

anyShare分享到: