GEEKTALK 年尾產品 一鋪晒冷

0
768

4

GEEKTALK

年尾產品 一鋪晒冷

上個禮拜五德國 IFA消費電子展開鑼,不過,各大參展商其實早已於會前自己開騷,搶先公布年內將會推出的終極秘密武器,手機、智能手錶、相機……全部有齊,想玩盡這些新 gadgets,認真要的起心肝儲錢。

相機最熱


同場仲有支 QX30可作 30倍光學變焦,有效焦距由 24mm至 720mm,可以 zoom到好遠,九月尾有得玩。

Sony的無線鏡頭再次搶盡收視,今次不單只加長變焦範圍,甚至可以換埋鏡!而 Casio亦推出分離式相機,好適合戶外活動使用。

隨意裝鏡
上年推出的無線鏡頭 QX10同 QX100,兩個都有鏡組,可以無線接駁手機,用手機屏幕取景同遙控影相,而就算無接駁手機,都可以盲影住相先。但今次這個 QX1,基本上只算是一個內置 APS-C感光元件(有效像素 2400萬)的無線接環,要裝埋 E系列鏡頭,先可以影到相。不過,感光元件變大,又可以換鏡,再一次提升手機拍攝的質素。


QX1無線接環除了可以換鏡,機身仲有埋彈出式閃燈,預計淨接環賣三千二百元,十月中推出。

QX1如果加裝長炮,搭手機影相好似誇張得滯。

Casio的 EX-FR10採用分離式設計, 1400萬像素、 F2.8光圈,可以拆出來獨立用,除了用藍牙連接觸控模組,亦可經 Wi-Fi連接手機,遙控拍攝或用屏幕取景。

手機小升

同預期一樣,手機無大驚喜, Samsung Note 4、 Sony Z3以小改款小 upgrade亮相。唯一有 talking point,是 Samsung的變種單邊曲芒機 Note Edge,同埋虛擬體驗頭罩 Gear VR,充分表現出 Samsung的「創意」!

玩邊芒
Samsung GALAXY Note 4同 Note Edge分別用上 5.7吋及 5.6吋靚芒,解像度高達 2560× 1440,鍾意用手機煲劇就肯定叫好。除此之外,最大變動是前後相機一齊提升,後置相機像素跳升 1600萬,仲有光學穩定器,昏暗環境影相應有更好表現;前置相機像素只微升至 370萬,但有 F1.9光圈同廣角鏡,更適合玩自拍。最特別是 Edge的右側屏幕曲線延伸至機側, Samsung表示主要用這條窄邊放提示訊息,或睇戲時擺操作掣,是否實用就要試過至知,但感覺上令屏幕變得脆弱,跌落地更易爆芒。


Sony雖然有 Xperia Z3、 Z3 Compact同 Z3 Tablet,但外形實在無睇頭,唯一可講,是新機支援 PS4的 Remote Play,可用來無線串流播放 PS4的畫面,屋企部電視俾人霸住,都可用手機、 tablet打機。

Note 4同 Note Edge的規格大致上一樣, 2.7GHz四核心處理器( Note 4另有 1.9GHz八核版)、 3GB RAM,但後者就有個小曲芒。兩部機都支援快叉功能,充電半個鐘可回復五成電量(圖為 Note Edge)。

同 Oculus一齊研發的虛擬體驗頭罩 Gear VR,可因應用家的頭部動作,實時轉變視點,適合用來玩第一身視點遊戲。不過,頭罩內無顯示器,要塞部 Note 4入去播畫面,認真離奇。

手錶玩圓


內置電池電量只比 G Watch多少少,如果耗電量同 G Watch差不多的話,隨時一日都捱不到。

繼 Moto 360(已公布於美國推出,約售$1,950)後, LG的新 smart watch都玩圓形錶殼,至於 Samsung, Gear S採用弧形錶面設計,雖然行自家 Tizen系統,但可插 nano SIM,無手機都可獨立運作。


Gear S最大賣點是可插 nano SIM,可以獨立拎出街用,更可直接用虛擬鍵盤覆 email同短訊,但價錢同發售日未定。

金屬圓
LG第二隻行 Android Wear系統的智能手錶, LG G Watch R今次玩金屬圓形錶殼設計,配備一個 1.3吋 320× 320解像度屏幕(錶殼直徑 1.8吋), 1.2GHz處理器同 4GB記憶體,錶帶可另配( 22mm),預計十月中推出,售價待定。

同場加映


預計 2015年初推出,售價待定,但每次只可吸 20至 30分鐘,屋企大少少都要分幾次吸。

全方位吸塵  Dyson最新設計的吸塵機械人
360 Eye,機頂有一個全景相機,可以分析自己的位置,以及自動設定吸塵路線,確保全屋都吸得乾乾淨淨。設計吸塵機都搞到好似設計火星探索車 Curiosity號一樣,夠爆。
text:周群雄
design:黎英豪

anyShare分享到: