創業通 學生OL最愛 紙膠帶商機

0
939

(左)Jobby說表示花卉、銀河星球、水彩畫等 pattern最受歡迎,「客人唔太鍾意北歐嗰種小朋友畫公仔嘅風格,嫌唔夠精緻。遇到反應唔理想嘅產品,我會做 promotion,例如買滿一定金額,就附送一卷呢啲膠帶。」(右)Jobby和本地插畫師 Carrie Illustration合作推出紙膠帶。$45

創業通

學生 OL最愛 紙膠帶商機

年輕人愛迷不同玩意,近年除蛋黃哥、美少女戰士等 hit items外,紙膠帶可說俘虜了不少 80、 90後少女的心。早在 13年尾, Jobby已洞悉先機,從日本引入 mt、 ROUND TOP等紙膠帶品牌,開紙膠帶網上專門店,接訂單接到手軟。 14年,她更與港台插畫家合作推出原創紙膠帶,令中學生、 OL都紛紛中毒,發掘紙膠帶商機。


生意如此穩定, Jobby卻拒絕開實體店,不想將租金成本轉嫁到客人身上,令價格上漲,「我啲客習慣網購形式,膠帶一般質地都差唔多,好少有圖片與事實不符嘅情況。加上我發貨有效率,客人付款後,一般兩日內都收到心頭好。」

採訪當日,童樂紙膠帶的負責人 Jobby雀躍地展示各種受歡迎的紙膠帶,「紙膠帶原本係用嚟黐烏蠅嘅膠紙, 07年日本最大嘅紙膠帶生產商 mt,開始喺膠紙印上唔同嘅圖案,結果大受歡迎。日本人會用嚟裝飾 schedule、包禮物、整心意咭,甚至用嚟裝飾家具、當牆紙黐。」
13年, Jobby到日本旅行,發現了紙膠帶,「喺日本發現有專賣紙膠帶嘅鋪頭,甚至有書教你點用膠帶裝飾家居,唔覺唔覺就迷咗落去。」

ig試反應


Jobby差不多每個月都會去日本入貨,「去東京一般留 7日,可以去埋當地小店入貨。如果去廣島、金澤、福岡, 3、 4日就走。」圖為今年 9月在廣島舉行的 mt展覽會。

當時香港只有誠品、少量網上代購有紙膠帶出售, Jobby將買多了的紙膠帶放在 ig shop售賣,結果,反應意外地熱烈,「我每日都收到問價嘅查詢,一個星期做咗十幾單生意,見有 market,開始搵入貨渠道。」
13年 8月, Jobby開始向日本最大型的紙膠帶供應商 mt入貨,「要同 mt攞貨,成本都幾高,每次最少 3、 4萬蚊,當時都冒幾大風險,見銷情理想,喺 facebook開 page做網店個幾月,啲貨都清得七七八八。反應好,我就引入埋其他紙膠帶品牌,好似 ROUND TOP、 maté等,售價由十幾至近 1百蚊不等。」

辭工搞網店

13年尾,訂單實在太多,應接不暇, Jobby辭去原來 marketing的工作,開了一個 web store,專心經營網上紙膠帶專門店,「旺季係夏天,好多大廠已推出秋冬、聖誕嘅限定款式,紙膠帶迷會預購咗先。𠵱家平均每月有 9萬蚊營業額,客人以中學生、 OL居多。」
除了日本外,台灣是另一個紙膠帶的主要供應地,「台灣好多插畫家都會出自家品牌紙膠帶,我引入咗鄧小熊、庫巴、 Hello Studio等插畫家嘅膠帶嚟試賣,果然吸引到一班追插畫,但冇玩開紙膠帶嘅 fans幫襯,嗰個月做咗 8萬蚊生意,比最初 6萬蚊,多咗 3成。」
眼見原創插畫的紙膠帶熱賣, Jobby決定再下一城,邀請台灣插畫家每一天的手帳日記合作設計紙膠帶。「我哋搵番 mt印,佢哋嘅和紙紙質最靚,可反覆黐幾十次,仲好少色差問題。每次最少印 500卷,唔夠一個月賣晒,再加印一次。」


mt推出的期間限定紙膠帶 set,不少 fans為得到包裝上單張紙膠帶而搶購,花紋只此一張,沒有卷裝發售。$180


凡買滿$200, Jobby便會送分裝咭(多由 mt膠帶廠出品,故又名 mt咭)給客人,吸引他們繼續買紙膠帶,「每卷膠帶有 5至 10米長,中學生用分裝咭 share,可以用平嘅價錢儲多幾個款。」 與本地插畫家玩 crossover


Jobby引入台灣插畫家「鄧小熊」的紙膠帶,頗受歡迎。$45

14年尾,因市面愈來愈多紙膠帶的銷售渠道, Jobby為增強競爭力,推出第二彈的原創紙膠帶,與本地插畫家合作,「我同皮忠、 Carrie Illustration合作推出嘅膠帶,一共 4款,各款印咗 1千卷,都差唔多賣斷。好多客人本身好鍾意佢哋嘅插畫,每款會買 2卷,一卷用,一卷珍藏。」
現時每月 Jobby最少飛一次日本,搜羅當地的期間限定紙膠帶,「 mt每個月大概搞 3次紙膠帶展覽,限定版紙膠帶只供現場發售,冇得入貨,所以我會親身飛去會場,入呢啲特別版箍住班熟客。」聽 Jobby說,她剛從廣島回來,沒想到,連紙膠帶也要新鮮速遞。

紙膠帶整小手作

任文職的 Rosey因愛造 scrapbook, 3年前迷上紙膠帶,「我去日本旅行順便會買特別款式嘅紙膠帶,我用紙膠帶整 scrapbook,貪佢哋顏色多、黐力強,好過用彩色咭紙去拼拼貼貼,身邊玩 scrapbook嘅朋友都係紙膠帶嘅 fans,有時用膠帶整心意咭, 15分鐘就搞掂,快夾靚。」


Rosey 文職Rosey表示買了第一卷紙膠帶便會沉迷,「每個月都會出新款,不知不覺就會買咗一堆。」


每逢遇上大時大節, Rosey都愛用紙膠帶親手造賀卡送給朋友。


Rosey會用紙膠帶裝飾 schedule,可以砌出一幅畫。 Fans照 buy

皮忠在一次市集上遇到 Jobby,被獲邀合作推出紙膠帶。「 15年初,童樂推出印有我水彩畫嘅紙膠帶,一款係鹿,另一款係水母。好多鍾意我插畫嘅朋友一見我出紙膠帶,都好興奮話:『終於出,等咗好耐!』我先知原來咁多朋友鍾意玩紙膠帶。」


皮忠 本地插畫家皮忠擅長水彩畫,最近有開班教畫。


皮忠與童樂合作推出的紙膠帶「 Dreamy Deer」。$55


童樂邀請台灣及香港插畫家合作推出紙膠帶,由 mt印刷,在包裝底部印有童樂的字樣。 專玩分裝咭

13年, mt於香港誠品搞展覽,男朋友送了兩卷紙膠帶給 Jessica,令她入了坑(膠帶界術語,即沉迷紙膠帶)。「我依然會寫信畀筆友,會用紙膠帶裝飾信紙,或者用分裝咭捲膠帶送畀同學。我儲過千卷紙膠帶,試過每個月用 2、 3千蚊買膠帶,但𠵱家收斂咗好多。」


Jessica 學生Jessica表示有 ig shop售賣已貼上紙膠帶的分裝咭,「分裝咭上會捲咗 1米嘅紙膠帶,價錢視乎膠帶種類,幾蚊至廿幾蚊都有。」


Jessica喜歡將分裝卡當小禮物,送給筆友。 開班教手作


Zita 家庭主婦Zita非常手巧,去完旅行會自製相冊,記下行程的點點滴滴。

09年, Zita開始接觸 mt紙膠帶,現在觀塘開班教人整 scrapbook。「初初學整 scrapbook嘅朋友手藝未必咁好,紙膠帶絕對係佢哋嘅好幫手,因紙膠帶韌性好高,最啱用嚟黐相簿嘅接駁位,揭多兩次都唔會咁易爛。」

開業成本

入貨:$70,000
雜費(公司註冊/包裝品/文具及基本器材):$25,000
總投資:$95,000

每月開支

營業額:$96,000
入貨:$58,000
雜費(包裝品/市集租金):$1,500
人工:$10,000
盈利:$26,500

[email protected]童樂 TOLO紙膠帶 x手作
http://tologroup.com

撰文:杜曉婷
攝影:傅新發、陳子禮
部分圖片由被訪者提供

anyShare分享到:
SHARE
Previous article職刻十大 上班族秋冬滋潤身心10法