Major 飛甩大台 英超、Netflix新方案

0
901

 

Major

W1236_011_01p飛甩大台 英超、 Netflix新方案

近年本港大台節目嘅膠味,已去到難以抵擋嘅程度,其實世界各地影視內容眾多,轉投「外國勢力」亦非壞事!例如英超球迷下年可訂閱由內地互聯網公司 Letv購得之 3季英超轉播權,直接串流到智能裝置或電視上睇。有追睇外國劇集嘅朋友,亦有香港版 Netflix定於來年投入服務,雖則尚未提及有邊啲內容,但「估計」 Netflix Originals自家製劇集,好似播完冇耐嘅《 Narcos》及《夜魔俠》同名電視劇版,應該會一併引進本港,等你唔使再浪費生命睇大台膠劇!

Letv英超多裝置同播

以往睇英超只得硬食收費電視台貴 plan,不過呢個傳統觀賞模式,已被來自內地嘅 Letv打破!事關佢哋已成功投得 2016至 2019年 3季英超轉播權,同時支援電視、盒子及手機收看,畀用家透過一個帳戶,隨時於唔同裝置收睇,更會加入估賽果、瀏覽球場環境等互動內容,有得睇又有得玩。影像質素方面則提供 1080p及 4K解像度,並提供 10T頻寬串流。想睇最靚畫面就要升級埋家居寬頻,否則入波先窒畫面就慘慘豬喇!


由樂視購得之英超轉播權會同時下放至電視、盒子及手機觀賞,意味阿仙奴對利物浦一類世紀大戰,可以畀用家隨時隨地收睇。


發布會當日請得曼聯前門將舒米高撐場,貫徹品牌高調作風。 銳意本土化 粵語譯名唔少得

雖知道樂視貴為內地品牌,但其亞太區執行總裁莫翠天(莫總)已在發布會表示會以本土化為大前提,用番粵語旁述、粵語球隊及球星譯名,唔使球迷花時間估「切爾西」係車路士,「魯尼」係朗尼。當然收費亦好值得關注,莫總笑稱要時間研究,不過可以透露係如於 10月 8日至 11月 18日期間購買 Le TV Box 4K標準版盒子,即可免費收睇來季英超 1個月賽事,約定朋友一齊睇,好合理啊!


官方表明所有英超比賽會用番粵語譯名,唔會出現雲加變溫格(旺熱)、朗尼變魯尼等離奇名稱。


觀賞列陣

必揀 4k電視  Letv Series 3系列
由於用上 LG電視面版,所以影像風格望落較 soft,而尺寸方面備有 43吋、 55吋及 65吋 3款可選,不過只有後兩者先配備 4K解像度,所以想追求畫質嘅朋友,你識揀喇!售價:$2,999/43吋、$5,799/55吋、$11,499/65吋( a)

畀按金即睇  Le TV Box 4K標準版
只要付出$399按金,就可擁有呢款盒子之餘,仲可在半年內串流任睇品牌影視 4K音樂、劇集等內容。假如於購買期第 3至 6個月期間想退回產品,更可攞番全數按金,而今次產品仲特別在可於 24小時便利店購買,銷售模式都咪話唔創新。售價:$399( a)

Netflix 睇盡自家神劇

至於煲劇睇戲有品味嘅朋友,唔係仲慘情到晚晚捕實大台三線膠劇呀?嚟緊香港都有美國知名串流網絡電視平台 Netflix睇啦!如果大家有 click入去 Apple TV或新一代智能電視嘅操作介面,可能已經發現多咗「 Netflix」呢個按鈕,明年就正式投入服務。各位影視迷,唔爭在多等幾個月睇《 Narcos》( IMDb: 9.1/10分)、《夜魔俠》( IMDb: 8.9/10分)等一眾自家神劇吧!

向亞洲出發 點播名作及自家作

記者最初接觸 Netflix,係美國嘅朋友成日講點播功能有幾方便,好有以前去影碟鋪租戲睇任揀嘅感覺。好在 Netflix終於將服務擴展至亞洲,除剛開通嘅日本,香港、台灣及新加坡等地都預計於明年開通。雖然收費、裝置、內容等細節仍未公布,但估計佢哋多 device(如 Android智能電視、 Apple TV、 PS4等)對應、龐大影視庫等特色,應該一併引進,甚至連 Netflix Originals自家製劇集相信亦會引入香港。


令 Netflix備受本地影視迷認識之契機,不得不提《紙牌屋》呢齣於 IMDb評為 9/10分嘅政治神劇,連習近平訪美都提過呢!


記者同大家一樣想知更多 Netflix香港上線嘅消息,但唯一可做,就只有登記電郵等通知。網址: https://www.netflix.com/hk/


Netflix簡單易用嘅操作介面,亦係大受用家歡迎嘅主因。 觀賞列陣

微曲電影感  Sony BRAVIA S8500C
S8500C同品牌今年推出之旗艦型號電視一樣有 4K解像度及 Android作業系統,但特別之處係起用微曲屏幕,令用家在家中觀賞,都有好似去戲院睇戲嘅感覺,充滿電影感。售價:$25,980/55吋、$36,980/65吋( b)

入門全景聲  Lenovo Tab 2 A8-50
雖然只係 8吋屏幕嘅入門 tablet,解像度亦只有 1,200× 800,畫面唔算靚。不過勝在配備雙前置喇叭及 Dolby Atmos全景聲效,睇槍戰及科幻場面,可以有唔錯音效。售價:$2,099起( c)

傳統電視台應對

TVB里約奧運收鏡
大台劇集、綜藝節目「膠味濃郁」已人所共知,所以來年搶收視之計就在於轉播里約奧運,務求吸引唔同階層嘅觀眾眼球。之不過里約同香港有 12小時時差,唔知大家會否願意捱通宵去睇呢 306面獎牌係點誕生?

now TV播英超有阻滯
Letv得到英超轉播權已塵埃落定,不過 now TV係咪如傳聞所說仍可繼續播英超,仍屬未知之數!事關近日香港寬頻亦發通告指與 Letv簽署諒解備忘錄,有機會播到英超賽事。究竟 now TV用家應唔應該 cut台,又或者轉唔轉其他平台?真係要買定花生慢慢等。

Shoplist:

a. Letv(3128 9333)
b. Sony(2345 2966)
c. Lenovo(2516 3938)

撰文:蘇家華
攝影:陳子禮、傅新發

anyShare分享到: