Play House 翻生名人館同 Steve jobs狂 selfie

0
861

W1236_009_101B

Play House

翻生名人館同 Steve jobs狂 selfie

是咁的,作為果粉嘅記者妹,一直都好希望可一睹教主喬布斯嘅風采,可惜,天妒英才,教主早幾年就因病過咗身,搞到本來活在同一個星空下嘅我哋,如今要陰陽相隔!
好彩,近排有隊奧地利著名活雕塑藝術團體「 BIG NAMES」嚟咗香港,打扮成 10個世界著名偉人,咪以為佢哋一身金屬色係飲太多鉛水,實情呢種係歐洲非常流行嘅 cosplay叫活雕像 Human Statue,仲唔快啲同教主 selfie?

活雕塑藝術係乜嘢?

其實活雕塑藝術係一種行為藝術,源於西方,通過將活人用顏料塗抹成銅像、石像、金像等嘅形態,並配以肢體語言,帶出不同嘅藝術理念。好似 BIG NAMES就以扮演逝世偉人做主題,讓公眾接觸本來遙不可及嘅名人,繼而重新審視現代嘅自己。不過,要做活雕塑都唔係執個化妝就算,扮演前仲會花大量時間熟讀名人嘅生平、細微至人物小動作都會學埋(如教主托眼鏡等等),以便投入角色。到真正表演嘅時候,又要塗上大量油漆,冬天都還好,夏天真係一路行一路流汗,一路溶妝一路補,都咪話唔辛苦呀!

北京冰像
記者妹不論去邊度旅行,都撞到有人玩活雕像,仲發現唔只得銅像,比如北京的「黑樣子時空藝術團」,就曾經喺北京街頭裝扮成喺極地雪冰咗嘅探險家。

法老金身
烏克蘭早幾年搞咗個活雕塑比賽,有人就油滿金色,扮一向惜金如命嘅埃及法老王真係 fit晒!

港產片十八銅人
計落,港產片《食神》同《少林足球》入面嘅少林寺十八銅人其實都係活雕像嚟喎!佢哋將自己淋晒金油,再大耍功夫,擺明就係行為藝術啦!

精選翻生偉人逐個估

〈 BIG NAMES〉扮演世界十大著名偉人、一齊翻生,點會淨係企定定俾你影咁普通吖。班偉人仲會帶埋佢哋最象徵性嘅物品表演、同公眾交流,真係好似見緊真人咁㗎!其實你哋又估唔估得中晒佢哋 10個扮緊邊位名人?俾啲貼士大家,可以循佢哋手中嘅道具去估,估中冇獎,不過答案就喺下邊!

1.呢條明送分啦!你唔係唔知蘋果教主 Steve Jobs發明 iPhone之前,仲設計咗好有型嘅蘋果電腦同 Mac機啩?

2.佢係美國一種著名汽車嘅創辦人,就係因為佢喺 1908年,用佢獨創嘅裝配方法,令到汽車可以大量生產,生產出又平又可靠嘅車輛,令到家陣美國人人有車揸!

3.佢本身係美國一個藥劑師,喺 1885年調配出一種獨特嘅飲品,當年呢種飲品嘅材料有可卡因(即係毒品)以及酒精,不過其後經過社會不斷變遷同埋配方嘅改良,先成為今時今日瘋魔全球嘅飲品。

4.佢係近代最偉大嘅物理學家,佢提出 E=mc2呢條物理方程式,揭示咗物質質量與能量嘅關係,即係「相對論」呀。佢個名已經同「天才」劃上等號,答案呼之欲出喇!

5.佢係音樂神童, 3歲識彈琴、 5歲識作曲、 7歲已經出版《奏鳴曲》名留青史!不過,呢位扮演嘅藝術家都幾陰公,因為竟然有人以為佢係華盛頓。

6.呢位大家可能會比較陌生,但如果冇咗佢,教主應該都唔會發明到 iPhone,因為佢就係電話之父!

7.呢位真係講出嚟都未必知係邊個,所以更要喺度提吓,因為呢位法國工程師曾經有份建造世界各地多個著名嘅建築物,例如巴黎鐵塔、美國紐約自由女神像、波爾多嘅加龍河鐵道橋等等。

(答案)
1.史提夫.喬布斯( Steve Jobs)( 1955-2011)
2.亨利.福特( Henry Ford)( 1863-1947)
3.約翰.斯蒂斯.彭伯頓( John Stith Pemberton)( 1831-1888)
4.阿爾伯特·愛因斯坦( Albert Einstein)( 1879-1955)
5.胡爾夫岡·阿瑪迪斯·莫札特( Wolfgang Amadeus Mozart)( 1756-1791)
6.亞歷山大·格拉漢姆·貝爾( Alexander Graham Bell)( 1847-1922)
7.亞歷山大·居斯塔夫·艾菲爾( Alexandre Gustave Eiffel)( 1832-1923)

BIG NAMES係乜?

佢哋係奧地利一隊活雕塑藝術團體,由 10位奧地利藝術家,分別飾演不同年代的世界偉人,包括喬布斯、 Coco Chanel、愛迪生、愛因斯坦等等。經已喺世界不同國家巡迴演出咗 2年多嘅時間,如果想率先睇佢哋喺其他地方表演嘅片段,上 YouTube https://www.youtube.com/watch?v=FYaRqtERhNw

《 BIG NAMES》傳奇名人活雕塑流動劇場詳情
日期: 25/9- 13/10
時間:每天 12:00、 13:00、 14:00、 15:00、 16:00、 17:00、 18:00及 19:00,共 7場
地點:香港中環國際金融中心商場一樓中庭
查詢: ifc(2295 3308)

撰文:陳可兒
攝影:傅新發

anyShare分享到: